Shënime për autorin
Anton Marku u lind më 15 gusht 1971 në Gjakovë. Shkollën fillore të mesme i mbaroi në Gjakovë, ku kreu edhe Shkollën e Lartë Pedagogjike ‘‘Bajram Curri”-dega gjuhë dhe letërsi shqipe. Studimet Universitare i përfundoi në Prishtinë, ndërsa në Vjenë përfundoi studimet master në shkencat politike..
Ka 11 vitet që jeton dhe punon në Austri.
Me shkrime letrare ka filluar të merret që kur ishte nxënës. Shkruan kryesisht poezi për të rritur. Deri më tani ka botuar nëntë libra me poezi disa prej të cilëve janë përkthyer edhe në gjuhën angleze, gjermane, ruse, arabe, kroate dhe rumune.
Botimet:
1. ‘‘Cikloni i dashurisë’’ (2000)
2. ‘‘Gjurmë mbi hije’’ (2002)
3. ‘‘Dielli i mesnatës’’ (2004)
4. ‘‘Vizioni blu’’ (2010)
5. ‘‘Në duet me vetveten’’ (2012)
6. ‘‘Ishjut e jetës’’ (2018)
7. ,,Du meine Stimme’’ (‘’Ti, zëri im’’, 2018)
8. ‘‘The islands of life’’ (‘‘Ishujt e jetës’’,2018)
9. ‘‘Në secilën hije pak dritë’’ (2019)
10. ,,Die Haut des Lebens’’ (2020)
Ai po ashtu është prezantuar edhe në disa antologji dhe revista në Austri dhe Gjermani, si në: ,,Man fragt mich, ob ich bin (2009); ,,Stadtschattirungen’’ (2015); ,,Words and Wolds‘‘(2016, 2017, 2019 dhe 2020); ,,Liebe’’ dhe ,,Wir, bewegende Steine’’ (2017), ,,Ausgewählte Werke XXI’’, ,,Anima‘‘ dhe ,,Ein Tag in meinem Leben’’ (2018); ,,Türen’’ (2019); ,,Freiheit’’ (2020); ,,Barmherzig’’ (2020), revistat ,,Zwischenwelt’’ 2014), ,,Aktuell’’ (2017 dhe 2018), ,,Literarisches Österreich’’ (2017 dhe 2019), ,,Literamus 45’’ (2018) dhe ,,Literamus 46’’ (2019) si dhe në disa antologji të krijuesve shqiptarë në mërgim.
Anton Marku është anëtar i Lidhjes së Shkrimtarëve të Kosovës, i Lidhjes Ndërkombëtare të Shkrimtarëve IWA Bogdani, i Lidhjes së Krijuesve Shqiptarë në Mërgatë, i Lidhjes së Shkrimtarëve të Austrisë, i PEN Klubit të Austrisë, i shoqatës ‘‘IG-Autorinnen und Autoren’’, këshillit redaktues të revistës ‘‘Words and Worlds‘‘, i klubit letrar në Vjenë ‘‘Der Kreis’’, klubit letrar ‘‘Gjon Nikollë Kazazi” të Gjakovës si dhe i Lidhjes së Shkrimtarëve dhe Krijuesve Shqiptarë në Austri ‘‘Aleksandër Moisiu’’ në Vjenë.
Anton Marku
MUNGESA JOTE
Mbrëmë
më fort dëgjoheshin
të dridhurat e zemrës sime
sa sa zhurma e hapave të tu
sonte
ti i mungon dhomës sime
në mua
u ndez diçka
që nuk ja dija emrin
sy i fshehur prapa syrit
u bëra
andej dritares së hapur
pashë si i mbaje dorën
mbi gjoksin tënd të bardhë
puthjes si i gdhendje fytyrën
shtrirë mbi buzët e tij.
DETI I SAJ
Tym i bardhë
i dëftoi
rrugën për tek ajo
zhurma e zjarrit
thyhej gjethnajave
lumi i tij
këmbëzbathur hyri
në detin e saj
një gur më tepër
gëlltiti.
FRYMËPLOT
Fjalët puthen
në këngën tënde
ti vallëzon vetëm
dhe mëson çdo ditë
të duash
toka bën dritë
qiellin përshëndet
tingujt e borës që bie
të shoqërojnë
një rrugë e gjatë
nga unë
tek ti.
MË PAS
Këpucët e jetës na i grisën
rrugët që nuk i njohëm
ujërave të ndotur
shpesh i shpërlamë sytë
askush nuk e di
në ç’orë
drunjëve do t’u bien degët
pastë më shumë dritë
më pas.
NË KËRKIM
I kishte të gjitha
por i mungonte diçka:
nuk mund të ëndërronte
një ditë la pas gjithçka
dhe u nis
të kërkonte vetveten
të bëhej i gjallë
bile një herë.