Dije Demiri- Frangu, është autore e 12 librave. Shkruan për fëmijë, për të rritur dhe kritikë letrare. Është profesoreshë në Degën e Letërsisë Shqipe të Fakultetit të Filologjisë, në UP “Hasan Prishtina”.
GËRSHËRËT I SHTYJ MATANË
më heq pak vdekje nga trupi im i gjallë floktarja
ju fut gërshërët flokëve të mi
ato shelgje të tharë bien në dysheme
vera e vjeshta e dimri që i kishin rritur bien
si cunga të djegur
bien erërat e motit që i kishin shpupuritur
vetëm që të krijonin bukuri
dhe përkëdheljet tua mbi to, bien
si bubullimë i ndijë
pa një pa dy edhe duart e tua ranë
floktares gërshërët ia shtyj matanë
Ishte shterë ajri
Ishte verë ishte shterë ajri
Oksigjeni ish rrallu si mendtë e plakut
Gjetheve hënës zogjve ju kish rënë tensioni
Ikona romantizmi ishin bërë
Lodhshëm unë sillja sytë qiellit
Zhegu orkestronte turrecët
Që sitnin gjumin mbi fytyrën time
Vrastarët e vetëm të vapës
Trimat këngëtarë
Derisa qielli hapi sytë
E re ti i veshur me shiun
E shërove ajrin shërove sytë e mi
Gabimi i shqisave
shqisat gabojnë
si fëmijët
që ndërtojnë
mungesën e dordolecëve
shqisat shënojnë
në tabelën e memories
hartën e asgjësë
hartën
me mua e me ty
shqisat gabojnë
si zemra
gabojnë
dhe pastaj tkurren
ujë të bekuar lëshojnë
Du me ble një allti
më shtyn si era renë
në zonën e hijes
si mi i Orvellit
më han shpirtin
gur i hedhur cepave të udhës
ashti të vetmisë më bën
kufomë e madhe
e ndjesive të harruara
seç më rri para
gjithçka duket keq
asnjanësia kullot në qiellin tonë
du me ble një allti
sall ta vras
asnjanësinë
Përgjasimi
ai druri atje
si unë është
merret me vetminë
e tij
natën frikësohet si unë
e i rritet bota
rrënjët nuk e di ku i prekin
as unë ku ëndrrat i kam
Djajtë
djajtë asnjëherë
nuk kanë bërë mëkate
ata dinë të ruhen nga
hija e vet
-sa më dhimbsen engjëjt
ata mëkatojnë
duke mbrojtur
dashurinë e përveçme