Jeton Kelmendi
TË JESH NJERI
Shën terezës time
Fillim shtatori
Qielli zbret dashuri
Sa lartë mbërrika njeriu i gjakut tim
As pasaportë nuk i kërkohet
As ndalime nuk i bëhen
Kufijëve.
Ta mbërrijë njeriun
Një jetë udhë bëri e lumja,
Adresën e kishte të shkruar mirë.
I madh është ky vit
Sivjet
Për njeriun.
Lumturia shenjtërohet,
Dashuria lumturohet.
Lum njeriu që i lutet
Shpirtit saj
Dashuri me i pasë jeta.
Besimi i madh në njeriun
Sa shumë më je madhëruar.
Më gozhdojnë si Krishtin
Do mendime dashurie, më dehin
Pamundësitë, me i’u përgjigjë largësive
Si mund të jesh njeri,
Shenjtëri…
Rrëfimi duhet nisur nga këtu,
Por dukjet më janë të padukshme
Në vogëlsinë time të madhe,
Ka vetëm shenjtëri
Dhe shtator shenjtërimi;
Apo jo Shën Tereza ime, Gonxhe.
Njeri
Këto janë rrënjët e jetës,
Adresë
Kur ke vetëm dashuritë.
Kohës së lazdruar
Rri drejtë shqiptari im,
Përtej të nesërmes e pasnesërmeve
Shekut bëjnë miliniume tjera,
Epoka dashurishë.
Me bekimin e Shën Terezës
Gjithnjë shko drejtë,
Shko përpara.
Një mijë rrugë tjera
S’mund ta ndryshojnë drejtimin
Dashurinë, adresë kur ke
Të jesh shenjtëri
Nuk është e pamundur
Njeri.
Me 04. Shtator 2016, Prishtinë
GJENI ARBEROR
E pash kujtesën e shekujve
shkonte analeve të historisë
krenaria.
Gjeni i tyre,
I Skënderbeut,
ne jemi arbër,
Arbëreshe është qenia jonë.
Po kërkoj gjenin tim
në një vend tjetër.
Rrugëtim kohësh në pakohësi,
më tund te një fillim:
trungu e rrënjë
bimë të mbjella në pafundësi.
Fjalët mbushën zë Shqip
ato rriten shpresave për të nesërmen,
Fjalët e vjetra
rinohen kuptimeve të mëdha
një ngjyrë ka, një ëndërr
Dashuria arbërore.
Poezisë nuk i fshihen shkronjat
përderisa të jetë poezi
fjalët mblidhen vet
siçk mblidhen arbëreshët e mi.
këtu ndjehesh vetvetja
më shumë se kudo tjetër.
Bruksel,7 janar 2022
NGA BRENDIA E JASHTES
Nga dritarja e jetës
e sotmja shikon të nesërmen
një gjuhë të përbashkët, kanë dëshirat
alfabet dashurinë
nga dera e shkuarjes
vijnë njerëz që nuk i do shikimi
tutje, lumi i të pathënave vërshon
ku dreqin banon koha
përplot mbushen zbrazjet
unë jam rruga, ti ardhja?
Hajde këtu në oborrin e pritjes
jeta mirëpret banoret e vet
prej syve të ditës
qielli lagu qerpikët e pranverës
kush e shpërfill brendinë nga jashtë
jashtë vetës ka mbetur
nga brenda lëkurës njerëzore
kam qenë dëshmitar i historisë fanatike
sa e sa kohë kanë banuar në mua
dhe s’janë më
qëllimi ka do kohë që është zgjuar
nga gjumi i ëndrrave të veta
arsyeja ka humbur që moti
e koha po luan me rregullat e lojës
o ju që vini pas nesh
në doni të keni rrugën tuaj
mbajani tjetër drejtim.
Auderghem Pranverë 2015